أحلام طالب

من طرف مولود حداد الجمعة نوفمبر 06, 2009 4:06 pm

السلام عليكم ورحمة الله

قصيدة
اليوم حول طالب في القسم النهائي كان يحلم أنو لما يتحصل على البكالوريا
تفتح له الآفاق واسعا لكن ما وجد في الجامعة يا ترى؟ تابعوا معنا في
القصيدة

بَسـْمْ الله مُــولْ المَـنَّـة ***وَالصْلاَة عْلَى صَاحَبْ السُّنَـة *** مُحَمَّـْد بْـذَكْـرُو نَتْهَـنـَّى
جَابَلْنَـا الرِسَالـَة وَالـدِّيـن

كُنْتْ إنْسَانْ عَنـْدِي طُمـُوحْ *** شْحَالْ كْبِيرْ وْمَفْتـُوحْ *** نْحَبْ دِيمَـا نَبْلـُغْ الصُّـرُوحْ
ونـْكـُـونْ مالـبَـارِزيـن

وْعْلِـيـه
دَرْتْ فَالـخُـطَّـة *** نْوَّلـِي قِيـَادَة كَـادْرْ دِيطَـا ***وِيــذَا رَبــِّي زَادْ عـْطَـا
نَتْرَشَّحْ رَئِيـسْ للجَزَائِرِيِيـن

وْجَـاوْ هَـذُوكْ الرَّبـْعْ ايّـَامْ *** وْخـُوكُـم زَيّـَـرْ لـَحـْزَامْ *** بَـدَّلـْتْ كــُلْ السِّيسْـتَـامْ
لِيلِـي وَنْهَـارِي مَتْمَاثْلِـيـنْ

ظَهْرَتْ النَّتِيجَة وْخْرَجْ اسْمِي *** وَالفَرْحَة دَوَّاتْ فِي جَسْمـِي *** الـدَّارْ ذَبْحُـولِـي عَجـْمـِي
وْكَانـُوا بِــيَّا فَرْحَانِـيـن

وْأَولْ
شـِي فـِي عَقْلِيـْتِـي *** شُوقْ كْبِيـرْ لِلُونِيفَارْسِيتـِي ***اللِّي عَقْبـُو عْلِيهَـا خَاوْتـِي
وْكَانُـو مَنْهـَا مَتْخَرْجِـيـنْ

وَالنْهَارْاللَّوَلْ نْتَاعْ التَّسْجِيلاَتْ *** الغَاشِي تْقُولْ الأُمَّة كَامَل جَاتْ *** وَالسْخَانَة تْرُونْتْ سَاتْ (37)
وَحْنـَا فَالشَّمـْسْ مْقَابْلـِيـنْ

خَيَّرْتْ فَرْعْ العُلُومْ السِّياسِيـَّة *** بَاشْ يَخْدَمْلـِي ذِيـكْ الغَايـَة *** اللِّي ذْكَرْتْهَا قْبِيـلْ فَالبِدَايـَة
يَاخـِي رَاكُـم مَتْفَكْرِيـنْ؟؟؟

بْدَاتْ الـدُّرُوسْ يـَا سِيـدِي *** وْقُلْتْ نْخَرَّجْ كُلْ مَـا عَنـْدِي *** مـَنْ طَاقـَة لَكـِّن يَـا وَدِّي
الإمْكَانـَاتْ كَانُـو غَايْبِيـن

كـِي تَدْخُـلْ لـْذَاكْ المُـدَرَّجْ *** نُصْ يَقْرَا وَالبَاقِـي يَتْفـَرَّجْ *** قَالُولْنَا اصْبرُوا رَاهْ رَبِّي يْفَرَّجْ
والكْرَاسَـى يْكُونُـو كَافْيِيـن

الشَمْبْرَا نْتَاعْ زُوجْ فِيهَا رَبْعَة *** وَالرِّيسْتو أَنْتَارْدِي الشَّبْعَـة *** وْ مُظَاهَرَاتْ فَالجَامِعَة
بـَالـظُـرُوفْ مْـنَـدْدِيـنْ

وِيذَا رْكَبْتْ فِي ذَاكْ الكُـوسْ *** تْقـُولْ كْرِيمِينـَالْ مَحْبـُوسْ *** عَالكـَرَامَـة غِـيـرْ دُوسْ
وْمَـا تْكـُونْ مَالطَّمَاعـِيـن

وْبــَـالاَكْ الـغِـيـَابـَاتْ *** خُصُوصًـا فَالتِّيدِييـات (td) *** وْيَاوِيحْ اللِّي بْقَاوْلُو لِي دَاتْ
يْتَبْعُوهْ حَتَّى عَشْـرْ سْنِيـنْ

هْنـَا عـَاوَدْتْ شَفْـتْ لْحَالِـي *** وْقُلـتْ عِـيـشْ يَالـزَّوَالِـي ***القَنَاعَة الكَنْزْ اللِّي مَـا يَفْنَالِـي
وَالشِي صْعِيـبْ يَـا سَامْعِيـنْ

لَكِنْ مَاعْلِيـشْ طْرِيـقْ المَجْـدْ *** أََوْلُـو دِيمَـا صَبْـرْ وْجَـلَـدْ *** مـَـا نَغْـتَـمْ مــَا نَتْنـَهَّـدْ
نْـكـُـونْ مَالإيجـَابِـيـِيـنْ

وْهَـذِي سُـنَّـة رَبّْ العِـبَـادْ *** مَاشـِي قـَالْ مُولُـود حَـدَّاد *** الدَّنيا تَعَب وْتَضْحِيـَّة وْجِهـَادْ
النَّفْسْ هْنَا وْكَايَن جِهَاد فْفَلَسْطِين

وْبَالمُنـَاسَـبَـة رَحْ نَغْـتَـنَـم *** هَـاذْ الفُرْصَـة بـَاش نَتْرَحَـمْ *** عَالشِّيخ يَسِين وْكُلْ مـَنْ قـَدَّمْ
حْيَاتُـو فـِدَاء لْهـَاذْ الـدِّيـن

هَـذَاكْ هُـوَ خِيـر الأَمْثِـلَـة *** اللـِّي تْحَبَسْـلَـكْ المُخَيَّـلـَة ***رَجُـلْ قَعِيـدْ قَـادْ مَرْحَـلَـة
دْيـَال الـدِّفـَاع والتَّمْكِـيـنْ

قَالْ مَالاَزَمْشْ يَتْحَوَّلْ المَسَـارْ *** إمَّـا شـَهَـادَة أوْانْتِـصَـار *** القَضَِّة مَاهِيشْ فِي مُجَرَّدْ أشْبَارْ
يْقِيـسُـوهَـا الجُغْرَافـِيـيـن

القَضٍيـَّة قضِـيـة صُـمُـود *** فـِي وَجـْه الظَلَمَـة اليَهُـود *** مَا رَايْحِينْش نَغَلْبُوهُم إذَا الجُهُود
تْفَرْقَـت وْكُـنـَّا مَتْنَازْعِـيـن

وَحـْنَـا يَلْزَمْـنَـا الـوَفـَـاء *** لـْهَـاذ الـنـَّاسْ الأتْـقِـيـَاء *** وَرَثـَـــة الأنْـبـِـيـَـاء
للهَمْ نـْكُـونُـوا حَامْـلِـيـن

الأم اللـِّي تْرَضَّـع *** الشِبْل اللـِّي يَطْلـَع *** فـِي قَلْبـُو تَطْـبـَع
أفكَار أحْمد ياسِيـن
التلميذ اللِّـي يَقـْرا *** لازم يْحَقَّق النُّصْـرة ***بَالفِعْلْ مُو بَالهـَدْرَة
لأفكار أحمد ياسيـن
المُعلَّم اللي يْـدَرَّّس *** يْوَاصَل مَـا يْحَبـَّس ***حَتَّى فَالنَشْء يَتْنَغْرَس
أفكار أحمد ياسيـن
الطالـب فَالجَامِعَـة *** وَاجَب عْلِيه يَسْعَـى *** بَاش النَّاس تَتْوَعـَّى
بأفكار أحمد ياسيـن
الشَاعر اللِّي يَشْعَـر *** لازم يَدْفَـع وَيْؤَثـَّر *** فَالجُمْهُور الحَاضَـر
بأفكار أحمد ياسيـن

فَالأخيـر كَلمْـة نْقُولـْهَـا *** فلسطيـن يَارَبـِّي احْفَظْهَـا *** بَرْعَايْتَـكْ وَحْنَـا فـْدَاهَـا
وْمَانـَاشْ فِيهَـا مْفَرْطِيـن
بَصَّحْ اسَمْعُوني يَانَاسْ لَمْلاَحْ *** اللِّي خَانْ حَيِّ عَلىَ الفـَلاَحْ ***يْخُونْ حَيِّ عَلـَى الكِفـَاح
وَالصَّـلاة عَمُـود الـدِّيـن